«Мән бүтүн мәзунларымызла фәхр едирәм»

Print Friendly, PDF & Email

    Нахчыван шәһәр Әкбәр Ағайев адына интернат мәктәби 1961-ҹи илдә рәһмәтлик Сәкинә Әлийева Нахчыван МССР-нын Маариф назири оларкән (сонралар 1990-ҹы илин йанвар һадисәләри илә бағлы Нахчыван МССР-нын Али Советинин Рәйасәт һейәтинин сәдри-Нахчыванын ССРИ-нин тәркибиндән чыхмасы һагда фәрмана имза атан гәһрәман гадын) мәрһум Иса Мәммәдов тәрәфиндән тәшкил едилмишдир вә 1998-ҹи иләдәк фәалиййәт ҝөстәрмиш, 1998-ҹи илдән бу ҝүнәдәк онун базасында Нахчыван шәһәр 8№-ли мәктәб фәалиййәт ҝөстәрмәйә башламышдыр.
Нахчыван шәһәр Әкбәр Ағайев адына интернат мәктәбиндә мәнә гәдәр директор ишләмишләр (1961-1971-ҹи илләр):

Иса Мәммәдов-5ил

Байрам Мәммәдов-3ил

Һәмзә Әһмәдов-2ил

   Интернат-мәктәб тәшкил едиләркән Иса мүәллим өзү таныдығы мүәллимләри топламыш вә ҝөзәл коллектив йаратмышды. Нахчыванын габагҹыл вә тәҹрүбәли мүәллимләри бу мәктәбә ҹәлб едилмишди.

Һәмин ил мән Нахчыван районунун кечмиш Тәзәкәнд мәктәбиндә рус дили мүәллими ишләйирдим. Иса мүәллимин чағырышы илә мән дә бу ҝөзәл коллективин үзвү олдум.

     Интернат-мәктәб ачыларкән йалныз 4-ҹү, 5-ҹи 6-ҹы вә 7-ҹи синифләр фәалиййәтә башлады. О вахт интернат-мәктәбә гәбул олмаг чох чәтин иди. Чүнки ахын чох иди.
Мән Кәнҝәрли Мухтар Исҝәндәр оғлу бу мәктәбдә әввәлҹә рус дили мүәллими вә тәрбийәчи, баш тәрбийәчи, 1972ҹи илдән 2001-ҹи иләдәк исә, директор вәзифәсиндә чалышмышам.

    Бу мәктәб һәмишә Нахчыван шәһәринин габагҹыл мәктәбләриндән олмуш, 1985-ҹи илдә Азәрбайҹан Республикасында фәалиййәт ҝөстәрән 64 интернат мәктәби арасында кечирилән бахыш мүсабигәдә 1-ҹи йери тутмушдур.

    О заман интернат-мәктәбин шәһәр әтрафында 3 һектар әкин саһәси вар иди. Бурада шаҝирдләр мүхтәлиф тәрәвәз мәһсуллары: помидор, хийар, говун, гарпыз вә с. йетишдирирдиләр. Һәмин тәрәвәз мәһсуллары тамамилә өзүмүзү тәмин едир, артыг галаны исә шәһәрдәки ушаг бахчаларына верирдик.

    Интернат-мәктәбдә ишләдийим мүддәтдә онларҹа мәзунумуз мәктәби гызыл вә ҝүмүш медалларла, фәргләнмә аттестаты вә тәрифнамә илә битирмиш, Республикамызын вә кечмиш ССРИ-нин Москва, Кийев, Минск, Ленинград, Харков вә с. шәһәрләриндәки али мәктәбләрә гәбул олунмушлар.

    Медалчы мәзунларымыз: Сәфәров Сәмәд, Ибраһимова Ҝүлтәкин, Аббасова Зәрифә, Абдуллайева Дилшад, Иманов Мурад, Рүстәмов Елдар, Әлийев Камал, Газыйева Фәридә, Һәзийев Јадулла, Рүстәмов Елшад, Аббасова Мәлаһәт, Фәрзәлийева Пүстә, Гәһрәманова Хәйалә, Сейидов Мирәләкбәр, Гасымов Камал, Пашайев Мухтар, Гулийев Һидайәт, Абдуллайева Дездемона, Гулийев Фәррух, Һаҹыйев Ингилаб, Дүнйамалыйев Гочәли, Әлийев Тофиг, Рәҹәбов Талыб, Бәширов Сәдрәддин, Нәбийев Һидайәт вә башгалары али мәктәбләрә гәбул оларкән елә биринҹи имтаһандан әла гиймәт алараг али мәктәбләрә гәбул олунмуш вә медалчы адларыны доғрултмушлар.

    Бүтүн бунлар габагҹыл мүәллимләримиз Микайыл Садигов, Шәфигә Әлийева, Гонча Тарвердийева, Ибраһим Газыйев. Зейнәб Һаҹыйева, Кәмалә Ағайева, Ләтифә Кәләнтәрли, Шәмил Рәһимов, Фируз Рәһимов, Хүррәм Рәһимов вә башгаларынын әмәйинин нәтиҹәсидир.

    Интернат-мәктәбин мәзунлары Әлийев Мәһәррәм (А.Р Президент Апаратында шөбә мүдири), Һәсәнов Әли (А.Р Президент Апаратында иҹтимаи-сийаси шөбәнин мүдири), Әлийев Гафар (А.Р Президент Апаратында сектор мүдири), Хәлилов Ширин (Дахили гошунларда ҝенерал лейтенант), Әлийев Низамәддин (тикинти саһәси), Әсҝәров Мирзә (һәким), Пашайев Мухтар (һәким),  Гасымов Камал, Исмайылов Ҹәби, Сейидов Мирәләкбәр, Гасымов Әләкбәр, Һаҹыйев Јенисей, Һаҹыйев Ингилаб, Әлийев Тофиг, Рәсулов Әсҝәр, Дүнйамалыйев Гочәли, вә башгалары һазырда Республикамызда вә онун һүдудларындан кәнарда һүгуг, елм, сәһиййә, тикинти, вә халг тәсәррүфатынын башга саһәләриндә уғурла чалышырлар.

    Интернат мәктәбин фәалиййәт ҝөстәрдийи 1961-ҹи илдән 2001-ҹи иләдәк 40 ил әрзиндә (1998-ҹи илдән мәктәб Нахчыван шәһәр 8 сайлы орта мәктәби кими фәалиййәт ҝөстәрсә дә, һәмин мәктәбин тәмәли интернат мәктәби олмуш, йәни орада охуйан шаҝирдләр тәһсил алмаға мәһз интернатдан башламышлар) һәмин мәктәби 919 шаҝирд битирмишдир.

    Һәмин шәҝирдләрдән 13 нәфәри гызыл, 2 нәфәри гызыл медалы әвәз едән фәргләнмә аттестаты, 14 нәфәри ҝүмүш медал алмыш, 69 нәфәр тәрифнамәйә лайиг ҝөрүлмүшләр (өтән илләр әрзиндә бу гызыл вә ҝүмүш медалларын йеринә верилирди) – бунларын ҹәми 98 нәфәр едир. Һесаб едирәм ки, бу пис ҝөстәриҹи дейил: фаиз һесабы илә 10,6% тәшкил едир. Ону да гейд етмәк лазымдыр ки, мәктәбин тарихиндә елә бир һал олмамышдыр ки, медалла вә йа фәргләнмә илә битирән мәзунлар Республикамызда вә онун һүдудларындан кәнарда йерләшән али тәһсил мүәссисәләринә гәбул олмасынлар.

    Һәмин мәзунларын бир гисминин адыны йухарыда гейд етмишәм. Бу йахынларда онларын там сийаһысы бу йазыйа әлавә олараг бу өврагда (сайтда) йерләшдириләҹәк.

“Мән бүтүн мәзунларымызла фәхр едирәм”
Мухтар Кәнҝәрли Бакы, ийул, 2013-ҹү ил.

Нахчыван шәһәр интернат мәктәби мүәллимләринин
мәзунларын бир групу илә ҝөрүшүндән фото ҝөрүнтүләр

Нахчыван шәһәр интернат мәктәби мүәллимләринин
мәзунларын бир групу илә ҝөрүшүндән видео ҝөрүнтүләр

Добавить комментарий

Ваш адрес email не будет опубликован.